Teksa fushata elektorale sa vjen e bëhet më e nxehtë dhe i afrohet hapjes zyrtare të saj, forcat politike shtojnë përpjekjet për të bërë për vete sa më shumë shqiptarë me të drejtë vote, e në të njëjtën kohë shtohen akuzat e kundërakuzat. Partia Demokratike akuzoi këtë të mërkurë maxhorancën socialiste se po tenton të manipulojë votën e diasporës. Sipas Demokratëve në këtë kuadër, socialistët po hapin zyra pranë konsullatave tona në shtete të ndryshme, duke u hequr si të ishin të KQZ. Ivi Kaso për këtë akuzoi në mënyrë të drejtëpërdrejtë Niko Peleshin. Si pjesë e këtij plani për manipulim të votës së 11 majit, ai ka hapur një zyrë të PS ngjitur me konsullatën e Shqipërisë në Selanik dhe e paraqet si zyrë shtetërore të KQZ. Siç është në traditën e komunistëve, përziejnë shtetin me partinë. U bëjmë thirrje shqiptarëve në Greqi që të mos gënjehen nga afërsia e zyrës me konsullatën shqiptare, edhe kjo një shkelje më vete, dhe të kuptojnë se të dhënat që japin aty i shkojnë PS dhe rrjetit të patronazhimit. Komisionerit shtetëror të zgjedhjeve i bëjmë thirrje të sqarojë qytetarët se KQZ ka zyra vetëm në Tiranë dhe operon përmes sajtit zyrtar online. Teksa I konsideron si zyra patronazhimi që marrin të dhënat personale të shqiptarëve, KAso I bën thirrje Komisionerit të të Dhënave Personale dhe SPAK të hetojnë dhe mos lejojnë që paligjshmëri të tilla të cënojnë procesin zgjedhor.
