Muzeu Historik i Fierit organizoi një veprimtari të veçantë në kuadër të Ditës Kombëtare të Trashëgimisë Kulturore, duke sjellë në vëmendje pasurinë materiale dhe shpirtërore të trevës së Myzeqesë dhe rëndësinë e njohjes, ruajtjes e përcjelljes së saj brez pas brezi.
Në qendër ishte vallja dyshe myzeqare, e klasifikuar së fundmi si vlerë kombëtare e trashëgimisë kulturore jomateriale. Artistët e familjes Myzeqeja sollën për të pranishmit karakteristikat e kësaj valleje, ndërsa nuk mungoi as vallja rrethore e vajzave.
Por përtej interpretimit artistik, aktiviteti kishte edhe një dimension historik. Studiues dhe historianë folën për origjinën, zhvillimin dhe vlerat e këtyre valleve, si pjesë e identitetit të trevës së Myzeqesë.
Dhe mes atyre që ndoqën nga afër këtë aktivitet ishin edhe nxënësit. Prania e tyre nuk ishte e rastësishme, pasi pikërisht te brezi i ri synohet të përcillet ajo që është trashëguar ndër vite.
Drejtori i Muzeut Historik Ilirjan Gjika, theksoi se për ta mbrojtur trashëgiminë kulturore, duhet së pari ta njohim atë.
Ky ishte edhe një nga mesazhet kryesore të aktivitetit: trashëgimia kulturore nuk është vetëm dëshmi e së shkuarës, por një pjesë e gjallë e identitetit të një komuniteti dhe një përgjegjësi që kalon nga një brez te tjetri.
Veprimtaria u drejtua nga Drejtori i Muzeut Historik të Fierit, historiani Ilirian Gjika, ndërsa të pranishëm ishin përfaqësues të Bashkisë Fier, drejtues të artit dhe kulturës, historianë, studiues, mësues, nxënës dhe të ftuar të tjerë.