Partia Demokratike, dega Lushnjë organizoi një protestë qytetare për të ngritur shqetësimet lidhur me gjendjen e Spitalit të Lushnjës dhe kushtet me të cilat përballen pacientët dhe stafi mjekësor. Protesta u zhvillua një ditë pas zgjedhjes së Kryetarit të ri të degës, Gentian Çela.
Qindra qytetarë u mblodhën në hyrje të spitalit, ku shprehën pakënaqësitë e tyre për problematikat që, sipas tyre, kanë shoqëruar prej vitesh këtë institucion shëndetësor. Protestuesit kërkuan investime konkrete për përmirësimin e kushteve, shtimin e shërbimeve dhe pajisjeve mjekësore, si dhe statusin rajonal për Spitalin e Lushnjës.
Gjatë fjalës së tyre, qytetarët ndanë përvoja personale lidhur me trajtimin dhe shërbimet e marra në spital, por vlerësuan punën dhe përkushtimin e mjekëve e infermierëve.
Pas protestës para spitalit, protestuesit marshuan në rrugët kryesore të qytetit drejt bashkisë. Në përfundim të protestës deputeti i PD-së Saimir Korreshi falënderoi qytetarët për pjesëmarrjen dhe mbështetjen, duke deklaruar se protestat për problematikat që shqetësojnë komunitetin do të vazhdojnë.