Dinamo përmbysi Elbasanin 2-1 në javën e tretë të Superiores, duke marrë fitoren e dytë radhazi në kampionat. Në sfidën tjetër, Tirana siguroi pikët e para të sezonit, pasi mposhti Vorën 4-0 në “Selman Stërmasi”.
Elbasani kaloi i pari në avantazh ndaj Dinamos me Nikajn, por skuadra e Ilir Dajës reagoi dhe përmbysi rezultatin. Hekuran Berisha dhe Lorenzo Vila shënuan për Dinamon, duke i dhënë ekipit kryeqytetas tri pikët.
Me këtë fitore, Dinamo regjistroi suksesin e dytë radhazi dhe ngjitet në vendin e tretë të renditjes, pas tri javësh kampionat.
Për Elbasanin, situata mbetet më e vështirë. Verdheblutë kanë vetëm dy pikë pas tri ndeshjeve, pas dy barazimeve dhe humbjes ndaj Dinamos.
Trajneri Ivan Gvozdenovic e pranoi momentin e vështirë të skuadrës, por u shpreh se ekipi mund ta ndryshojë situatën përmes punës.
Sipas tij, Dinamo ishte më mirë në qarkullimin e topit dhe dy golat e pësuar nga goditjet standarde ndikuan në humbje.
Ndërkohë, Tirana mori fitoren e parë të sezonit me një rezultat të pastër 4-0 ndaj Vorës. Për bardheblutë shënuan Kish, Xhixha dhe Hazrollaj, ky i fundit me dopietë.
Pas tri javëve, Egnatia kryeson kampionatin me pikë të plota, ndërsa Teuta dhe Dinamo ndjekin në vendet pasuese.