Një nismë humanitare në mbështetje të një nxënësi të klasës së pestë ka bërë bashkë komunitetin arsimor në Fier. Erald Shahu, nxënës në shkollën 9-vjeçare “Leonora Bare” në Drizë po përballet me një betejë të vështirë me leuceminë.
Prej rreth një muaji e gjysmë ai ndodhet i shtruar në Qendrën Spitalore Universitare “Nënë Tereza”, ku po merr trajtimin mjekësor. Vështirësitë janë edhe më të mëdha, pasi të dy prindërit e tij janë të sëmurë dhe për kujdesin ndaj Eraldit është angazhuar halla.
Thirrjes për ndihmë të shkollës 9-vjeçare “100 Vjetori i Pavarësisë” në Zhupan iu përgjigjën edhe 11 institucione të tjera arsimore.
Falë kontributeve të komunitetit arsimor janë mbledhur rreth 6 milionë lekë të vjetra. Organizatorët theksojnë se ndihma duhet të vijojë dhe apelojnë për mbështetjen e të gjithë atyre që kanë mundësi të kontribuojnë.
Një nismë kjo që dëshmon se solidariteti dhe humanizmi shprehen përmes veprave. Urimi i përbashkët është që Eraldi të fitojë betejën me sëmundjen dhe të rikthehet sa më shpejt pranë familjes, shokëve dhe mësuesve të tij.