Alarm për përhapjen e Ebolës në Afrikën Qendrore. Bashkimi Europian ka thirrur një takim të jashtëzakonshëm të ministrave të Shëndetësisë për të koordinuar masat parandaluese, ndërsa shkencëtarët po zhvillojnë me urgjencë tre vaksina të reja kundër virusit. Deri tani janë raportuar mbi një mijë raste të dyshuara dhe afro 250 viktima.
Bashkimi Europian po ndjek me shqetësim përhapjen e një shpërthimi të ri të Ebolës në Afrikën Qendrore, që po konsiderohet si një kërcënim serioz për shëndetin publik.
Për këtë arsye, më 5 qershor do të zhvillohet një videokonferencë e jashtëzakonshme e ministrave të Shëndetësisë të vendeve anëtare të BE-së. Takimi është thirrur nga Presidenca e Qipros e Këshillit të Bashkimit Europian dhe synon koordinimin e masave të përbashkëta për monitorimin dhe përballimin e situatës.
Sipas autoriteteve europiane, fokusi do të jetë shkëmbimi i informacionit mes institucioneve shëndetësore, forcimi i mekanizmave të reagimit të shpejtë dhe rritja e gatishmërisë për të parandaluar përhapjen e mundshme të virusit përtej rajonit të prekur.
Ndërkohë, gara kundër kohës po zhvillohet edhe në laboratorët shkencorë. Aktualisht, tre vaksina të reja janë në fazë zhvillimi kundër variantit Bundibugyo të Ebolës, një formë e rrallë e virusit për të cilën ende nuk ekziston një vaksinë e miratuar.
Iniciativa Ndërkombëtare për Vaksinat e AIDS-it, Universiteti i Oksfordit dhe kompania farmaceutike Moderna po punojnë paralelisht për krijimin e vaksinave që mund të frenojnë shpërthimin. Ekspertët paralajmërojnë se çdo ditë është vendimtare.
Deri tani janë raportuar më shumë se një mijë raste të dyshuara në Republikën Demokratike të Kongos dhe raste të konfirmuara në Ugandën fqinje. Bilanci i viktimave i afrohet 250 personave.
Organizatat ndërkombëtare të shëndetësisë dhe grupet humanitare paralajmërojnë se situata mund të marrë përmasa të ngjashme me epideminë shkatërruese të viteve 2014–2016 në Afrikën Perëndimore, kur u infektuan dhjetëra mijëra persona dhe humbën jetën mbi 11 mijë njerëz.
Përballë këtij rreziku, Bashkimi Europian dhe komuniteti shkencor ndërkombëtar po përpiqen të veprojnë sa më shpejt, me synimin për të parandaluar një krizë të re globale shëndetësore.