Një studim i ri shkencor paralajmëron se virusi Chikungunya, i cili aktualisht është më i përhapur në rajonet tropikale dhe subtropikale, mund të zgjerojë ndjeshëm shtrirjen e tij gjeografike në dekadat e ardhshme, duke përfshirë edhe Evropën dhe Amerikën e Veriut.
Studimi, i realizuar nga shkencëtarë të Universitetit Mjekësor Zhejiang në Hangzhou, Kinë, thekson se ndryshimet klimatike po krijojnë kushte më të favorshme për përhapjen e dy mushkonjave kryesore vektoriale: Aedes aegypti dhe Aedes albopictus. Sipas studiuesve, rritja e temperaturave po zgjeron zonat ku këto mushkonja mund të mbijetojnë, duke rritur rrezikun e transmetimit lokal të virusit në qytete që më parë konsideroheshin të sigurta. Një nga autorët e studimit, Dr. Yang Wu, thekson se veçanërisht mushkonja tigër aziatike po luan rol kyç në këtë proces, pasi është më rezistente ndaj klimave më të ftohta.
Studiuesit paralajmërojnë se deri në fund të shekullit, zona të mëdha të Evropës Qendrore dhe Veriore, Amerikës Verilindore dhe Azisë Lindore mund të bëhen potencialisht “vatra të reja” të përhapjes së chikungunya-s. Edhe pse sëmundja rrallë është fatale, ajo mund të shkaktojë dhimbje të forta dhe të zgjatura të kyçeve, si dhe paaftësi afatgjatë. Emri “chikungunya” vjen nga gjuha Kimakonde dhe do të thotë “të përkulesh nga dhimbja”.
Organizata Botërore e Shëndetësisë Organizata Botërore e Shëndetësisë e konsideron atë një nga sëmundjet tropikale të neglizhuara, me dhjetëra mijëra raste të regjistruara çdo vit në mbarë botën. Studiuesit theksojnë se përgatitja e sistemeve shëndetësore, monitorimi i mushkonjave dhe forcimi i masave parandaluese janë thelbësore për të shmangur shpërthime të mëdha në të ardhmen, veçanërisht në rajonet që nuk kanë pasur më parë përballje me këtë sëmundje.