Në ambientet e Qendrës Kulturore për Fëmijë në Lushnjë është zhvilluar për të dytin vit radhazi konkursi artistik “Këndojmë, luajmë dhe vallëzojmë” me pjesëmarrjen e nxënësve të shkollave 9-vjeçare të bashkisë Lushnjë.
Qëllimi i aktivitetit ishte përçimi i dashurisë për traditën kombëtare dhe vlerat folklorike shqiptare përmes këngës, vallëzimit dhe lojërave popullore të nxënësve.
Sipas Drejtorit të Qendrës Kulturore për Fëmijë Saimir Brahja, një juri e QKF-së vlerësoi me diploma grupet më të mira sipas performancës.
Çmimin e parë e fituan nxënësit e talentuar të shkollës “Nënshkruesi i Pavarësisë Nebi Sefa” të drejtuar nga mësuesi i muzikës Beniamin Ademi dhe mësuesi i Edukimit Fizik Klevis Gjoni, ndërsa çmimin e dytë e mori shkolla “Kongresi i Lushnjës” dhe Çmimi i tretë iu dha shkollës “Zgjanë”, ndërsa çmimin inkurajues shkolla “Gafurr Muço”.
Në kategoritë e veçanta, grupi më i mirë folklorik u vlerësua ai i shkollës “Rrapi Mërtiri”, ndërsa zëri më i spikatur në interpretimin e këngës popullore u shpall nxënësi nga shkolla “Skënder Libohova”.
Aktiviteti u organizua nga Qendra Kulturore për Fëmijë në bashkëpunim me Zyrën Vendore të Arsimit Parauniversitar Lushnjë, duke sjellë një atmosferë festive dhe plot ngjyra.