Në një kohë rekord është arritur të mblidhet shuma prej gati 100 mijë dollarësh, e nevojshme për transportin dhe trajtimin e tij jashtë vendit. Falë solidaritetit të qytetarëve dhe kontributeve të shumta, Lukas niset drejt Italisë për të vijuar trajtimin mjekësor.
Vogëlushi ndodhet prej ditës së lindjes në një betejë të vështirë për jetën. Aktualisht është në reanimacion dhe i intubuar, për shkak të problemeve të rënda në mushkëri. Për familjen e Vladimir Vladaj, avokat në Shkodër, mbështetja e marrë në këto ditë të vështira është një rreze shprese. Apeli për ndihmë u shpërnda gjerësisht dhe përgjigjja e qytetarëve ishte e menjëhershme.
Tashmë, pas sigurimit të shumës së nevojshme, shpresa e familjes është që trajtimi në Itali t’i japë Lukas mundësinë të fitojë betejën për jetën dhe të kthehet pranë motrës dhe vëllait.