Një ekip mjekësh në NYU Langone Health në Shtetet e Bashkuara ka realizuar me sukses transplantin e parë në botë të mushkërive nga një dhurues HIV-pozitiv te një pacient HIV-pozitiv, duke shënuar një moment historik në fushën e transplantologjisë.
Ekspertët e konsiderojnë këtë procedurë një hap të rëndësishëm drejt zgjerimit të mundësive për transplant te personat që jetojnë me HIV, pasi rrit numrin e dhuruesve potencialë që deri më tani nuk merreshin në konsideratë.
“Ky është një moment vendimtar për komunitetin e personave me HIV dhe përfaqëson progres të vërtetë drejt barazisë në transplantimin e organeve”, deklaroi Sapna Mehta, drejtoreshë klinike e Institutit të Transplanteve në NYU Langone dhe një nga hartueset e protokollit kërkimor që bëri të mundur këtë ndërhyrje.
Sipas të dhënave zyrtare, rreth 1.2 milionë persona në Shtetet e Bashkuara jetojnë me HIV. Përparimet në terapitë antiretrovirale (ART) kanë bërë të mundur që shumica e tyre të kenë një jetë të gjatë dhe pothuajse normale, pa rrezik të transmetimit të virusit kur trajtimi ndiqet në mënyrë korrekte.
Përfitues i transplantit është 56-vjeçari Bertrand Nelson, i cili jeton me HIV prej afro 26 vitesh. Ai u diagnostikua me HIV dhe sarkoidozë në vitin 2000, një sëmundje inflamatore që prek mushkëritë dhe organe të tjera.
Megjithëse gjendja e tij ishte mbajtur nën kontroll për shumë vite, në vitin 2021 Nelson u prek nga sëmundja e Legjionarëve dhe kaloi disa javë i shtruar në spital për shkak të një forme të rëndë të pneumonisë. Infeksioni riaktivizoi sarkoidozën, e cila filloi të dëmtonte edhe mëlçinë e tij.
Gjendja shëndetësore u përkeqësua gjatë vitit 2024, duke e bërë atë të varur nga oksigjeni për të marrë frymë. Mjekët e referuan më pas në Institutin e Transplanteve të NYU Langone, ku, në kuadër të programit kërkimor të zhvilluar sipas HOPE Act, ai u përzgjodh për një transplant të dyfishtë të mushkërive dhe mëlçisë.
Mjekët besojnë se kjo arritje mund të hapë rrugën për më shumë transplante të ngjashme në të ardhmen, duke përmirësuar ndjeshëm aksesin në trajtime jetike për personat që jetojnë me HIV.