Autoritetet turke kanë zhvilluar një operacion të gjerë antidrogë në Stamboll, që ka çuar në ndalimin e 22 personave, përfshirë disa emra të njohur të industrisë së argëtimit, televizionit dhe rrjeteve sociale.
Operacioni u krye të enjten në mëngjes si pjesë e një hetimi të udhëhequr nga Zyra e Prokurorit të Përgjithshëm të Stambollit. Sipas autoriteteve, bastisje të njëkohshme u realizuan në disa zona të qytetit, në kuadër të një hetimi për trafik dhe përdorim të dyshuar të substancave narkotike.
Mes personave të ndaluar raportohen edhe figura të njohura publike, përfshirë këngëtarin Kenan Doğulu, aktoren Beren Saat, si dhe emra të tjerë nga muzika, televizioni dhe rrjetet sociale si Kerimcan Durmaz, Ayşe Hatun Önal, Ozan Doğulu, Berdan Mardini, Enis Arıkan dhe influencerja Selin Ciğerci.
Në listën e të ndaluarve përfshihen gjithashtu edhe disa producentë, artistë dhe personalitete të tjera publike, ndër ta Tolga Çam, Ferhan Kaya, Murat Saygı, Mehmet Cem Karcı, Yaşar İpek dhe të tjerë të përfshirë në hetim.
Autoritetet turke nuk kanë dhënë ende detaje mbi akuzat specifike ndaj secilit prej të dyshuarve, ndërsa procedurat ligjore dhe marrjet në pyetje vijojnë në drejtorinë e policisë së Stambollit.
Zyra e Prokurorit të Përgjithshëm ka bërë të ditur se hetimi mbetet i hapur dhe se operacioni është pjesë e një hetimi më të gjerë kundër rrjeteve të dyshuara të narkotikëve.