Irani po organizon një procesion funeral gjashtëditor për Ajatollah Ali Khamenein, Udhëheqësin Suprem i cili udhëhoqi Republikën Islamike për katër dekada dhe u vra në ditën e parë të luftës SHBA-Izrael në shkurt.
Ceremonia do të nisë nga kjo e shtunë, gati katër muaj pasi u vra Khamenei, dhe do të përfundojë më 9 korrik. Procesioni do të përfshijë qytete anembanë Iranit dhe Irakut përpara një varrimi përfundimtar në Mashhad, qytetin më të shenjtë të Iranit.
Autoritetet iraniane kanë hapur mijëra shkolla në kryeqytet dhe në të gjithë vendin për të akomoduar qytetarët që po marrin pjesë në ceremonitë masive të funeralit të Udhëheqësit Suprem të Iranit, Ayatollah Ali Khamenei.
Sipas agjencisë shtetërore ISNA, Ministria e Arsimit ka bërë të ditur se më shumë se 5,000 shkolla dhe rreth 40,000 deri në 50,000 klasa janë vënë në dispozicion për pelegrinët, në kuadër të një mobilizimi të gjerë shtetëror për ceremonitë mortore që po zhvillohen në Teheran dhe qytete të tjera të vendit.
Ceremonia pritet të jetë ndër më të mëdhatë në historinë e vendit, me pjesëmarrje masive qytetare dhe delegacione nga dhjetëra vende të botës. Sipas mediave ndërkombëtare, numri i pjesëmarrësve mund të arrijë në miliona njerëz gjatë disa ditëve të ceremonive.
Shkollat, si dhe institucione të tjera publike, janë shndërruar në hapësira pritjeje dhe akomodimi, ndërsa rrugët kryesore të Teheranit janë mbyllur pjesërisht për të lehtësuar lëvizjen e turmave dhe procesionet funerale.
Ceremonitë po shoqërohen me masa të forta sigurie dhe organizim shtetëror, në atë që autoritetet e quajnë një periudhë zie kombëtare dhe nderimi për figurën e Khameneit.
Në këto rrethana, vendi është në gjendje të lartë mobilizimi institucional, ndërsa funeralet pritet të vijojnë për disa ditë në disa qytete kryesore të Iranit.