Shqipëria mund të vulosë vendin e saj në finalet e kompeticionit të dytë madhor europian, me vetëm një pikë larg kualifikimit në “Euro 2024”. Këtë pikë do ta synojë sot në Moldavi. Grupi E mbetet djallëzisht i ngjeshur, me 4 skuadra matematikisht në garë për kualifikim.
Një fitore e vendasve do ta çonte grupin më të hapur se kurrë drejt xhiros finale të këtyre eliminatoreve. Të dyja ndeshjet në grupin E (Moldavi-Shqipëri dhe Poloni-Republika Çeke) do të kontribuojnë shumë nëse do të ketë gjithçka ose asgjë për të luajtur të hënën e ardhshme, por sido që të jetë, ka shumë të papritura në një grup shumë intrigues.
Shqipëria kryeson renditjen dhe i duhet vetëm një pikë për të siguruar kualifikimin. Pikë që duhet të dalë nga sfidat kundër Moldavisë ose kundër Ishujve Faroe javën e ardhshme. Kuqezinjtë janë pa diskutim favoritët më mëdhenj në grup për të prerë “biletën” drejt “Euro 2024”.
Nëse Moldavia do të humbiste, do t’i duhej një barazim në ndeshjen tjetër të grupit midis Polonisë dhe Republikës Çeke, pasi një fitore ndaj çekëve javën e ardhshme do ta kualifikonte më pas me Shqipërinë.
Një fitore për Moldavinë dhe një barazim në Varshavë do të nënkuptonte se skuadrës së Serghei Clescenco do t’i duhej vetëm një barazim me gola ndaj Republikës Çeke, pasi rekordi i përplasjeve kokë më kokë do t’i favorizonte moldavët.
Fitoret e Moldavisë dhe Polonisë sot do të shihnin vetëm 2 pikë që t’i ndanin katër kombëtaret, duke e bërë atë një nga grupet kualifikuese më të luftuara në xhiron e fundit. Nëse Republika Çeke fiton në Poloni dhe Moldavia nuk arrin të fitojë kundër Shqipërisë, atëherë do të ketë një ndjenjë antiklimatike në xhiron e fundit, pasi kjo do të shihte skuadrën e Sylvinhos të avanconte drejt Gjermanisë me çekët.
Shqipëria, pra, do të ndihet jashtëzakonisht e sigurt, duke pasur parasysh dy ndeshjet e saj të favorshme dhe rezultatet e fundit kundër skuadrave më të forta në grup. Shqipëria është e vetmja kombëtare në këtë grup që mund të pretendojë se ka treguar qëndrueshmëri, sepse ka marrë 13 pikë nga 15 të mundshme pasi u mund në Poloni.
Pas asaj disfatë në Varshavë, kombëtarja shqiptare ka pasur ecuri mbresëlënëse nën drejtimin e Sylvinho, i shoqëruar nga Pablo Zabaleta dhe Doriva si ndihmës. Paraqitja e mirë i ka dërguar shqiptarët në prag të një kompeticioni të dytë të madh, pas paraqitjes debutuese në “Euro 2016”.
Ky kualifikim nuk do të jetë kurrsesi i mbuluar me polemika. Shqipëria u ndihmua masivisht nga fitorja 3-0 në tavolinë për ndeshjen e ndërprerë në Serbi, si dhe zbritja e pikëve për fqinjët e saj ballkanikë, pasi lojtarët miq u sulmuan në stadiumin e Beogradit nga tifozët serbë, kur një dron që shfaqte një flamur, i cili e tregonte Kosovën si pjesë e Shqipërisë së madhe, fluturoi mbi fushë.
Në fazën finale të “Euro 2016”, Shqipëria ishte fatkeqe, duke u larguar nga faza e grupeve me golaverazh, pavarësisht se e fitoi ndeshjen e fundit në grup kundër Rumanisë. Tani janë fqinjët e Rumanisë, moldavët, të cilët potencialisht mund ta pengojnë rrugën e kuqezinjve për të kaluar në finalet e Europianit të verës së ardhshme.
Lojtarët e Clescenco janë bërë heronj kombëtarë duke pasur parasysh “bëmat” e tyre në këtë fushatë eliminatore, pasi barazuan me Çekinë, përpara se të merrnin 4 pikë ndaj Polonisë. Diferenca në renditje me kuqezinjtë do të ishte edhe më e vogël, nëse nuk do të barazonin në mënyrë zhgënjyese me Ishujt Faroe në xhiron e parë të ndeshjeve.
Kësisoji, Moldavia është e vetmja skuadër që ka lënë pikë ndaj skuadrës së fundit në këtë grup. Humbja e vetme e moldavëve në 6 ndeshjet e deritanishme në grup erdhi në Shqipëri, por në shtëpi ato kanë qenë fenomenal, pasi fitorja 3-2 ndaj Polonisë në qershor ishte një nga më të famshmet në historinë e futbollit të këtij vendi.
Trajneri Clescenco ka zgjedhur të njëjtin grup lojtarësh që i ka shërbyer aq mirë në këtë fushatë, deri më tani, kështu që pritet të mos e ndryshojë formacionin me të cilin rrëmbeu një pikë të pamundur në transfertën e Polonisë, muajin e kaluar.
Sulmuesi Ion Nicolaescu është rikthyer nga lëndimi në kohën e duhur për kombëtaren, pasi lojtari i Heerenveen nuk ishte paraqitur në fushë që nga ndeshja me Poloninë, para se të luante 12 minuta fundjavën e kaluar kundër Vitesse, ku shënoi golin e tretë të rëndësishëm. 25-vjeçari ka qenë lojtari kryesor në këto eliminatore për Moldavinë, duke shënuar golin e barazimit kundër Faroëve, si dhe ka shënuar 3 gola në dy ndeshjet ndaj Polonisë.
Armando Broja është mungesa e befasishme te kombëtarja shqiptare, pavarësisht rikthimit të tij së fundmi nga lëndimi me Chelsea, ku fitoi penalltinë e golit të barazimit 4-4 ndaj Manchester City, me pak minuta në fushën e lojës. Ashtu si homologu moldav, edhe Sylvinho ka zgjedhur të qëndrojë me grupin që e ka çuar Shqipërinë në prag të kualifikimit, kështu që formacioni startues sot pritet të jetë i pandryshuar.
Kuqezinjtë do të bëjë një ndryshim të detyruar nga ndeshja e fundit, pasi Arlind Ajeti është tërhequr nga grumbullimi i dëmtuar, duke iu bashkuar mungesave të tjera në mbrojtje si Marash Kumbulla dhe Enea Mihaj, po ashtu të dëmtuar.
Ardian Ismajli do të rikthehet në qendër të prapavijës kuqezi, çka do të thotë se Shqipëria ka të ngjarë të startojë me 7 futbollistë që luajnë në Serie A sot ndaj Moldavisë. Bilanci mes dy kombëtareve Shqipëria është përballur 5 herë në ndeshje zyrtare me Moldavinë, ku ka arritur të marrë 5 fitore (golaverazh 14-2).
Dy kombëtaret në fjalë kanë zhvilluar edhe një ndeshje miqësore më 15 gusht 2012, e cila përfundoi pa gola 0-0. Në të gjitha ndeshjet e luajtura për kualifikueset e Europianit, kombëtarja shqiptare ka fituar gjithmonë. Rezultati më i mirë i fundit i Moldavisë ishte fitorja 5-2 ndaj Malit të Zi, gjatë kualifikimeve të Kupës së Botës 2014. Kjo kombëtare nuk është kualifikuar kurrë në fazat finale të Kampionatit Europian dhe as të Botërorit deri tani.
Bilanci i përballjeve mes Shqipërisë dhe Moldavisë
29 mars 1995: Shqipëri-Moldavi 3-0 / Kualifikuese Europiani
7 qershor 1995: Moldavi-Shqipëri 2-3 Kualifikuese Europiani
15 gusht 2012: Shqipëri-Moldavi 0-0 / Miqësore
11 qershor 2019: Shqipëri-Moldavi 2-0 / Kualifikuese Europiani
14 tetor 2019: Moldavi-Shqipëri 0-4 / Kualifikuese Europiani
17 qershor 2023: Shqipëri-Moldavi 2-0 / Kualifikuese Europiani
Formacioni i mundshëm startues i Moldavisë: Railean; Revenco, Craciun, Baboglo, Marandici, Reabciuk; Postolachi, Motpan, Rata, Cojocaru; Nikolaesku.
Formacioni i mundshëm startues i Shqipërisë: Berisha; Hysaj, Ismajli, Gjimshiti, Mitaj; Asani, Ramadani, Bajrami; Asllani, Cikalleshi, Seferi.