Autoritetet italiane kanë zbardhur vrasjen e 58-vjeçarit shqiptar, Fatos Cenaj, ngjarje e ndodhur më 8 qershor në fshatin Fontaniva. Bëhet me dije se pas muajsh hetime, karabinierët kanë identifikuar autorin e dyshuar. Sipas mediave italiane, një punëtor 45-vjeçar, fqinj i viktimës, u vu në pranga lidhur me krimin. Pas muajsh hetime, mësohet se motivi i vrasjes së shqiptarit lidhet me mosmarrëveshje mes dy fqinjëve.
Trupi i viktimës u gjet në anë të rrugës, pranë triçikletës së tij. Vetëm ekzaminimet e mëvonshme mjekësore përjashtuan mundësinë e një aksidenti, duke i hapur rrugën një hetimi për vrasje. Ky hetim ndoqi disa pista dhe u krye me përpikëri, i mbështetur nga analiza shkencore nga Parma RIS (Instituti Kombëtar Italian për Hetim dhe Parandalim), të cilat u konsideruan thelbësore për rindërtimin e fakteve.
Ishin kamerat e sigurisë që çuan drejt autorit, të cilat filmuan një person pranë vendit të krimit. Ai mbante një helmetë në kokë, maskë dhe syze dielli, si edhe mëngë tatuazh. Për shkak se identifikimi ishte i pamundur sepse autori ishte i maskuar, përqëndrimet e hetuesve ishin tek mëngët tatoo të blera në internet.
Nga verifikimet u zbulua se fqinji i shqiptarit kishte blerë një sërë artikujsh të ngjashëm me ato që mbante veshur çiklisti i pranishëm në vendngjarje. Gjatë kontrolleve në banesë në muajin korrik iu gjetën pantallona, këpucë, një helmetë dhe mëngë tatoo. Përveç rrobave, karabinierët gjetën materiale të përdorura për të prodhuar pjesë dhe municione të armëve të zjarrit, një torno, plumba të punuar me dorë dhe shufra metalike të destinuara për prodhimin e komponentëve të mëtejshëm.
Kush është vrasësi?
Autori është një 45-vjeçar vendas nga Padova, i cili është shpallur përgjegjës për vrasje të rëndë. Oficerët e karabinierëve nga komanda provinciale e Padovës ekzekutuan një urdhër paraburgimi të lëshuar nga gjyqtari hetues i prokurorisë së Padovës. Ky urdhër përmbledh hetimet e kryera nga njësia hetimore e njësisë operative në bashkëpunim me karabinierët e Cittadellës. Hetimet mjeko-ligjore të kryera nga Shërbimi Special Hetimor Italian (RIS) i Parmës rezultuan vendimtare.
Si ndodhi ngjarja?
Mëngjesin e së dielës, më 8 qershor, vrasësi u pozicionua përgjatë rrugës që Cenaj ndiqte gjithmonë për të shkuar në punë në një stallë për kalërim. Ai e dinte se do ta gjente duke hipur në triçikletën e tij, pasi Cenaj kishte lëvizshmëri të kufizuar. Ai u shfaq pas tij, duke e goditur në kokë.
Plumbi hyri nën veshin e majtë dhe kaloi nëpër kafkën sipër syrit të djathtë. Një plagë e hollë që askush nuk e pa, aq sa punonjësit e urgjencës menduan se ishte një atak në zemër. Vetëm një skanim CT i kryer në spital konfirmoi të shtënë me armë zjarri, dhe ajo që dukej të ishte një atak në zemër u shndërrua në vrasje.