Pamje dramatike vijnë nga Kinë, ku një shpërthim i fuqishëm në një fabrikë fishekzjarresh ka shkaktuar 26 viktima dhe 61 të plagosur, duke ngritur pikëpyetje të shumta mbi shkaqet e tragjedisë.
Ngjarja ndodhi në provincën Hunan, ndërsa autoritetet ndërhynë menjëherë duke evakuuar banorët në një rreze prej 3 kilometrash nga zona e shpërthimit, për shkak të rrezikut të lartë.
Rreth 500 punonjës të emergjencës u angazhuan në operacionet e kërkim-shpëtimit, ndërsa për lokalizimin e personave të mbetur nën rrënoja u përdorën edhe drone dhe robotë. Shtatë persona u arritën të nxirren gjallë nga gërmadhat.
Policia ka nisur hetimet për zbardhjen e shkaqeve, ndërsa ndaj drejtuesve të kompanisë janë marrë masa paraprake, sipas mediave shtetërore. Brenda kompleksit ndodheshin edhe dy depo me barut, çka e shtoi rrezikun për shpërthime të tjera, duke detyruar ekipet të ndërhyjnë me hedhje uji për neutralizimin e zonës.
Shpërthimi ka shkaktuar dëme të mëdha materiale dhe ishte aq i fuqishëm sa theu xhamat e ndërtesave përreth, duke tronditur komunitetin lokal dhe duke vënë në pah nevojën për masa më të forta sigurie në industri të tilla.