Rritja e kërkesave për regjistrimin e fëmijëve në çerdhet dhe kopshtet publike ka sjellë nevojën për shtimin e kapaciteteve dhe rikonstruksionin e strukturave ekzistuese në Lushnjë.
Sipas Përgjegjësit të Arsimit në Bashkinë Lushnjë Muharrem Sharka aktualisht funksionojnë dy çerdhe, ndërsa në kopshtin nr. 4 janë hapur dy grupe të reja çerdheje. Ndërkohë kopshtet nr. 1, 2, 3 dhe 4 ofrojnë shërbim me drekë.
Gjithashtu Sharka sqaroi se kopshti nr. 2 është në proces rikonstruksioni. Për të vijuar shërbimin ndaj fëmijëve gjatë kësaj periudhe, baza materiale është transferuar përkohësisht pranë shkollës “4 Dëshmorët”. Për këtë situatë, ai u kërkon prindërve mirëkuptim deri në përfundimin e punimeve.
Sharka bën të ditur se kërkesat për regjistrimin e fëmijëve në çerdhe janë rritur dhe për t’iu përgjigjur kësaj kërkese pritet të hapet edhe një çerdhe e re.
Sipas Përgjegjësit të Arsimit pavarësisht rikonstruksioneve dhe ndërhyrjeve në disa prej strukturave, shërbimi për fëmijët në çerdhe dhe kopshte nuk ndërpritet.