Një zyrtar i lartë i ushtrisë ruse ka humbur jetën pas një shpërthimi me bombë në automjetin e tij pranë Moskës, sipas raportimeve të mediave ruse.
Viktima është koloneli 57-vjeçar Damir Davydov, drejtues i Drejtorisë së Furnizimit me Municione të Artilerisë dhe Raketave në ushtrinë ruse. Sipas burimeve, një mjet shpërthyes i vendosur poshtë automjetit të tij tip BMW shpërtheu rreth orës 05:30 të mëngjesit, ndërsa ai po udhëtonte pranë banesës së tij në qytetin Balashikha, shkruan Guardian.
Pamjet e publikuara nga media pranë Kremlinit tregojnë momentin kur automjeti përfshihet nga flakët dhe përplaset me një makinë të parkuar. Kalimtarët kanë nxituar për të nxjerrë kolonelin nga automjeti i shkatërruar, por ai nuk mundi t’u mbijetonte plagëve të marra.
Një dëshmitar që tentoi ta ndihmonte tha se Davydov ishte ende gjallë kur u nxor nga makina, por gjendja e tij ishte kritike.
Ngjarja konsiderohet si pjesë e një serie atentatesh që kanë shënjestruar zyrtarë ushtarakë rusë dhe figura të njohura pro luftës që prej fillimit të pushtimit rus të Ukrainës. Deri tani, as autoritetet ruse dhe as ato ukrainase nuk kanë komentuar zyrtarisht mbi incidentin.
Megjithatë, deputeti dhe ish-gjenerali rus Vladimir Shamanov e cilësoi sulmin si një “akt skandaloz”, duke kërkuar një përgjigje të ashpër ndaj autorëve.
Vrasja e Davydov pritet të rrisë presionin mbi shërbimet ruse të sigurisë, të cilat prej kohësh përballen me kritika për dështimin në mbrojtjen e figurave të larta ushtarake. Sulmi ndodhi në të njëjtën zonë ku pak më shumë se një vit më parë u vra në një atentat të ngjashëm gjenerali Jaroslav Moskalik, një prej drejtuesve kryesorë të operacioneve të forcave të armatosura ruse.
Ekspertët besojnë se operacione të tilla janë pjesë e një rrjeti të fshehtë aktivitetesh që synojnë objektiva ushtarake dhe zyrtarë rusë larg vijës së frontit, ndërsa lufta në Ukrainë vazhdon të prodhojë tensione dhe pasiguri edhe brenda territorit rus.