Fundi tragjik i 30-vjeçarit shqiptar Sajmir Beca, ka lënë pas shumë trishtim dhe pikëpyetje.
Ai humbi jetën në nëntor të vitit të kaluar në Mbretërinë e Bashkuar, pasi ishte futur në një kosh plehrash për të kaluar natën sepse ishte i pastrehë dhe u mor nga makina e mbeturinave.
Në një seancë të zhvilluar këtë javë, shoferi i kamionit përshkroi ngjarjen e rëndë, duke thënë se për shumë kohë ka jetuar mes makthesh.
Ai tha se i kontrolloi koshat por pa vetëm një karton, e më pas e ngarkoi koshin në makinën e plehrave. Pasi e zbrazi dhe ndezi butonin që bën lëvizjen ne tehut metalik, ai tha se dëgjoi britma të forta.
Menjëherë e ndaloi dhe njoftoi ambulancën. I riu shqiptar u transportua në spital, por disa ditë më vonë ndërroi jetë duke mos u bërë dot ballë plagëve.
Familja e tij udhëtoi nga Shqipëria drejt MB për të ndjekur hetimet, por gjykata e ka cilësuar këtë si një rast aksidental.
Familja e përshkroi Sajmirin si një person që rrezatonte mirësi dhe që kërkonte vetëm t’ua bënte jetën të tjerëve më të mirë, por që fatkeqësisht jeta e tij u ndërpre shumë shpejt në mes.