Një shtetas kinez dhe një kenian janë arrestuar në Nairobi pasi tentuan të kontrabandonin mbi 2,000 milingona mbretëreshë. Autoritetet paralajmërojnë për rritjen e trafikut të paligjshëm të insekteve ekzotike.
Një shtetas kinez dhe një bashkëpunëtor i tij nga Kenia janë arrestuar dhe akuzuar për trafikim të paligjshëm të faunës së egër, pasi u kapën duke tentuar të kontrabandonin mbi 2,000 milingona të gjalla mbretëreshë jashtë vendit.
Shtetasi kinez Zhang Kequn u ndalua në aeroportin ndërkombëtar të Nairobit, ku autoritetet zbuluan në bagazhin e tij një sasi të madhe milingonash të ruajtura në tuba prove dhe të mbështjella me letër. Sipas hetimeve, insektet ishin blerë nga Charles Mwangi, i cili dyshohet se i kishte shitur për rreth 10,000 shilinga keniane për çdo 100 milingona.
Autoritetet keniane kanë paralajmëruar prej kohësh për rritjen e kërkesës për milingona të tilla në tregjet e Evropës dhe Azisë, ku koleksionistët i mbajnë si kafshë shtëpiake. Megjithatë, nuk është konfirmuar nëse kjo ishte destinacioni përfundimtar i sasisë së sekuestruar, edhe pse bagazhi i Zhang ishte nisur drejt Kinës.
Të dy personat janë akuzuar edhe për komplot për kryerje vepre penale dhe aktualisht ndodhen në paraburgim. Mwangi përballet gjithashtu me një akuzë të dytë për tregtim të paligjshëm, pasi në një rast tjetër iu gjetën sërish milingona të gjalla.
Sipas mediave në Nairobi, të dy të akuzuarit kanë deklaruar se janë të pafajshëm. Avokati i Zhang, David Lusweti, ka argumentuar se ata nuk ishin të vetëdijshëm se po shkelin ligjin, duke shtuar se synimi i tyre ishte përfitimi ekonomik nga shitja jashtë vendit.
Të dy pritet të dalin sërish para gjykatës më 27 mars, ndërsa hetimet vijojnë dhe autoritetet nuk përjashtojnë arrestime të tjera në kuadër të këtij rrjeti të dyshuar.
Raste të ngjashme nuk janë të rralla në Kenia. Vitin e kaluar, katër persona u dënuan me burg ose gjobë pasi tentuan të kontrabandonin mijëra milingona mbretëreshë drejt tregjeve ndërkombëtare.