Në një operacion të shpejtë dhe profesional, Forca Detare ka shpëtuar katër turistë të huaj që rrezikonin të mbyteshin në Gjirin e Gramës.
Pas marrjes së sinjalit për ndihmë, anija patrulluese P-133 u nis menjëherë drejt vendit ku ndodheshin turistët, duke organizuar një operacion shpëtimi të suksesshëm.
Katër personat — dy gjermanë dhe dy francezë — u nxorën nga situata e rrezikshme në gjendje të qëndrueshme shëndetësore dhe u transportuan për kujdes të mëtejshëm.
Forca Detare në veprim – Shpëtohen katër turistë të huaj në Gjirin e Gramës
Sot, në orën 07:55, pasi morën sinjal për praninë e katër turistëve të izoluar në Gjirin e Gramës, Forca Detare reagoi me shpejtësi. Anija patrulluese P-133 u nis menjëherë drejt vendngjarjes për të ofruar ndihmën e nevojshme.
Rreth orës 09:30, anija vendosi kontakt vizual me turistët dhe nisi operacioni i shpëtimit përmes gomones. Në orën 09:45, mjeti lundrues u akostua në breg, ku u identifikuan katër shtetas të huaj – dy gjermanë dhe dy francezë, një mashkull dhe tre femra.
Pasi u sigurua gjendja e tyre shëndetësore, që ishte e qëndrueshme, ata u transportuan në bord dhe u pritën me kujdes e përkujdesje nga efektivët tanë. U ofruan ushqime dhe pije gjatë lundrimit drejt ishullit të Sazanit, ku do të vijojnë të marrin mbështetjen e mëtejshme të nevojshme.
🤝 Ky është një tjetër shembull i përkushtimit dhe gatishmërisë së Forcës Detare për të qenë gjithmonë aty ku ka nevojë për ndihmë.
🇦🇱 Në det, në çdo kohë – për njerëzit, për jetën.
