Aktorja kanadeze Carrie Anne Fleming, e njohur për rolet e saj në seriale të njohura televizive si iZombie dhe Supernatural, ka ndërruar jetë në moshën 51-vjeçare. Lajmi u konfirmua nga përfaqësuesi i saj për People, i cili bëri të ditur se aktorja ishte diagnostikuar më parë me kancer të gjirit. Sipas të njëjtave burime, ajo ndërroi jetë në paqe, e rrethuar nga familjarët dhe të dashurit e saj.
“Ishte një privilegj i madh të njihja Carrie-n. Ajo ishte një shpirt i bukur, e sjellshme dhe një frymëzim. Do të na mungojë shumë,” thuhet në deklaratën e përfaqësuesit. Humbja e saj ka prekur edhe kolegët. Aktori Jim Beaver, me të cilin ndau ekranin në serialin “Supernatural”, reagoi në rrjetet sociale duke e kujtuar si një person plot jetë dhe mirësi.
“Ajo ishte një burim jete dhe mirësie, me një të qeshur ngjitëse dhe një personalitet tepër të dashur,” shkroi ai, duke e cilësuar si një “shpirt binjak” dhe duke shprehur dhimbjen e thellë për humbjen e saj.
Carrie Anne Fleming lindi më 16 gusht 1974 në Nova Scotia dhe më pas u zhvendos në British Columbia, ku ndoqi studimet për aktrim. Ajo ndërtoi një karrierë të pasur në televizion, film dhe teatër, duke u bërë e njohur veçanërisht për rolet në zhanrin horror, si në Masters of Horror, si dhe në filma si The Tooth Fairy dhe Bloodsuckers.
Aktorja lë pas një vajzë, Madalyn Rose.