Thatësira e tejzgjatur ka shteruar mbi 200 puse uji në tre fshatrat Gjerbës, Selitë, Kapaj të njësisë administrative Fratar në Mallakastër. Mungesa e ujit prej më shumë se tre dekadash e ka kthyer përditshmërinë e banorëve në një makth të vërtetë. Në të tre fshatrat rrjeti ujësjellës nuk arriti kurrë të sjellë ujë në rubinetat e çesmave, ndërsa puset e hapura individualisht janë tharë. Banorët tregojnë vështirësitë me të cilat përballen çdo ditë sidomos mbushjen ujë me hajvanë tek burimet që janë tre kilometra larg dhe pagesat e faturave deri në 7 milion lekë.
Banorët e fshatit Kapaj kanë tentuar të hapin puse deri në 130 metra, por kanë dështuar. Presim reshjet thonë ata të cilat ndikojnë shumë pak në furnizimin e puseve me ujë.
Të tre fshatrat janë tepër piktoreskë, me një pamje mahnitëse dhe shumë pranë liqeneve artificiale Lumare 1 dhe Lumare 2, dy veprave të mëdha ujore të ndërtuara në kohën e regjimit komunist ndërtimi i të cilave erdhi si pasojë e kërkesës për ujë në sektorin e bujqësisë. Mungesa e investimeve thonë banorët , na ka lënë në këtë situatë dëshpëruese e mbijetese, qê ka çuar në braktisjen masive të këtyre tre fshatrave. Ata apelojnë njëzëri për reagim nga strukturat përkatëse, pasi ndihen tërësisht të braktisur.