Sali Berisha ka biseduar me qytetarët online, duke folur për vizitën e misionit faktmbledhës të Parlamentit Europian dhe Partive Popullore Europiane në Shqipëri.
Ai tha se deputetët e PE-së dhe përfaqësuesit e 30 partive anëtare të PPE-së gjetën një situatë të vështirë dhe shokuese në vend.
Sipas Berishës, misioni u njoh me problematikat e shumta që prekin Shqipërinë dhe premtoi mbështetje të fuqishme për opozitën dhe qytetarët shqiptarë.
Ai po ashtu tha se një raport tjetër po përgatitet për të denoncuar qeverisjen e Edi Ramës dhe regjimin e tij.
Berisha falënderoi misionin për vlerësimin e qëndresës së opozitës dhe siguroi qytetarët se mbështetja nga institucionet europiane do të jetë e vazhdueshme.
Fjala e plotë e Kryedemokratit Berisha:
Të dashur miq, ditët që kaluan kishin disa zhvillime të tjera jashtëzakonisht pozitive për ne, për opozitën dhe për shqiptarët.
Në Shqipëri erdhi misioni faktmbledhës i Parlamentit Europian për të parë në vend gjendjen në Shqipëri.
Këta deputetë, të gjitha grupeve parlamentare të PE, pasqyruan dje dhe pardje, gjatë këtyre ditëve qëndrimet e tyre në mënyrë shumë të përgjegjshme dhe reale gjendjen në Shqipëri.
Mbi këto raporte dhe mbi këtë bazë, dje një raport për Shqipërinë paraqiti të gjithë problematikën e madhe të Shqipërisë.
Një raport tjetër po përgatitet për të damkosur Edi Ramën dhe regjimin e tij.
Përveç kësaj, jeni dëshmitarë se gjatë kësaj jave në Shqipëri qëndroi për dy ditë misioni faktmbledhës i Partive Popullore Europiane, i përbërë nga përfaqësuesit e 30 partive politike anëtare të kësaj organizate, i kryesuar nga sekretarja e përgjithshme Dolors Montserrat dhe nënkryetarja e PPE.
Në takimet e tyre të shumta me PD, me median, me shoqërinë civile, ata gjetën një realitet shokues, duhet t’ua them, e vlerësuan shokuese gjendjen dhe na garantuan për mbështetje të fuqishme.
Na përgëzuan për qëndresën që bëjmë dhe na siguruan për mbështetje më të mëdha.