Policia e Parisit hapi zjarr ndaj një gruaje e cila kërcënonte se do të hidhej në erë në metronë e qytetit. Gruaja e mbuluar dyshohet se kërcënimet me vdekje i bëri në mbështetje të terrorizmit në një stacion treni në kryeqytetin francez.
Gruaja fillimisht u izolua nga policia dhe më pas u qëllua duke mbetur e plagosur rëndë. Dëshmitarët e pyetur nga mediat franceze thanë se, gruaja ishte “plotësisht e mbuluar” dhe bërtiste “Allahu Akbar”.
Shërbimi zjarrfikës, i cili ofroi ndihmën e parë për gruan, tha se ajo u godit nga një plumb në bark. Ajo u transferua në një spital aty pranë dhe është nën kujdesin e mjekëve.
Transmetuesi BFM TV dhe gazeta e përditshme Le Parisien cituan më herët burime policore duke thënë se sjellja e gruas tregonte një motivim të mundshëm “terrorist” islamik.
Gruaja e panjohur, u izolua në stacionin e Bibliotekës François Mitterrand, e cila u evakuua menjëherë nga të gjithë pasagjerët pas indikacioneve të parashikuara nga plani anti-terrorist që është në zbatim që prej 13 tetorit pas goditjes me thikë të një mësuesi në një shkollë publike nga një ekstremist islamik.
