Një Boeing 787-8 Dreamliner i Air India me destinacion New Delhi u kthye në pikën e nisjes në Hong Kong të hënën si masë paraprake pasi njëri nga kapitenët dyshoi për një problem teknik gjatë fluturimit, tha një burim me njohuri të drejtpërdrejta për çështjen.
Incidenti vjen vetëm disa ditë pasi një aeroplan i ngjashëm Boeing, që operonte një fluturim të Air India për në Londër, u rrëzua në qytetin perëndimor indian të Ahmedabad menjëherë pas ngritjes, duke vrarë 241 nga 242 personat në bord.
Dreamliner, i cili po operonte sot fluturimin AI315 të Air India nga Hong Kongu, tani po i nënshtrohet inspektimeve, sipas burimit me njohuri për çështjen.
Fluturimi AI315 u devijua për në Aeroportin Ndërkombëtar të Hong Kongut dhe kërkoi të vihej në pritje atje rreth orës 13:00 — “Ai u ul në mënyrë të sigurt rreth orës 13:15”, tha një zëdhënës i Autoritetit të Aviacionit Civil të Hong Kongut. Shërbimet e aeroportit nuk janë prekur, tha zëdhënësi.
Fluturimi AI315 u nis nga Hong Kongu në orën 12:20 (ora lokale) dhe u ul rreth një orë më vonë. Ai kishte arritur një lartësi prej 22,000 metrash para se të fillonte zbritjen e tij, sipas faqes së internetit të ndjekjes së fluturimeve AirNav Radar. Aeroplani është shtatë vjeç.
Boeing dhe Air India nuk iu përgjigjën menjëherë një kërkese për koment mbi fluturimin Hong Kong-Nju Delhi.
