Nëpërmjet një akti normativ, Këshilli i Ministrave ka ndryshuar buxhetin për vitin 2025.
Pas një analize për 5 muajt e parë të vitit, 11.8 miliardë leke do të alokohen apo rialokohen në mbështetje të sektorëve prioritarë, por edhe në nxitjen e mëtejshme të investimeve publike.
Siguria digjitale do të marrë dhe vëmendjen kryesore. Pjesa më e madhe e fondeve do të shkojë në formën e një rialokimi në drejtim të sigurisë digjitale dhe rritjes ekonomike.
Rishikimi i buxhetit përfshin dhe sektorin e Bujqësisë. Një skemë e re Garancie Sovrane do të realizohet për sektorin e Bujqësisë. Me një vlerë prej 3 miliardë lekësh. Garancia do të shërbejë për rritjen e aksesit në financë kryesisht për Ndërmarrjet e Vogla dhe të Mesme, por edhe krijimin e kushteve për rritjen e kapaciteteve prodhuese dhe konkurueshmërisë.
Ndërsa një rishpërndarje fondeve të brendshme do të kryhet në kuadër të përmirësimeve në teknologjinë e informacionit në administratën publike.
Pavarësisht ndryshimeve, deficiti buxhetor mbetet në nivelin prej 68.1 miliardë lekësh, pa asnjë rritje, dhe borxhi publik nuk pëson ndryshime.
