Sot nxënësit e klasave të 9-ta rreth 594 të bashkisë Lushnjë zhvilluan provimin e fundit, atë të gjuhës së huaj.
Provimi nisi në orën 10:00 dhe gjuhët e huaja që u dhanë si provim i detyruar ishin: Anglisht, Frëngjisht, Italisht dhe Gjermanisht.
Gjithashtu, nxënësit e pakicave kombëtare vlerësohen edhe në lëndën gjuhë e huaj.
Ndërsa, nxënësit me aftësi të kufizuar që ndjekin shkollat e zakonshme i zhvillojnë provimet kombëtare të arsimit bazë, sipas përcaktimeve në rregulloren për zhvillimin e provimeve kombëtare të arsimit bazë.
Provimi zgjati rreth 2 orë e 30 minuta dhe nxënësit u paraqitën një orë para tij në 8 qendra e testimit, në shkollat “4 Dëshmorët”, “Foto Puka”, “Skënder Libohova”, “Kongresi i Lushnjës”, Fiershegan, SHMB Kolonjë, Dushk dhe Krutje e Sipërme.
Ndërkohë sot rreth 28 mijë nxënës në vend iu nënshtruan provimit të gjuhës së huaj në 340 qendra që u administruan dhe u monitoruan nga stafe të kualifikuara të institucioneve tona arsimore.
Brenda muajit qershor nxënësit e klasave të 9-ta iu nënshtruan provimeve kombëtare në gjuhë shqipe, 19 qershor, matematikë, 25 qershor dhe sot gjuhë e huaj, 30 qershor.
Provimet shënojnë fazë të rëndësishme në formimin e nxënësve ndërsa ata përgatiten të nisin studimet e nivelit të dytë.
