Akuza të reja po dalin në dritë lidhur me Prince Andrew i cili dyshohet se ka kërkuar pagesa nga taksapaguesit britanikë për masazhe personale dhe shpenzime të tepërta udhëtimi gjatë mandatit të tij si i dërguari special për tregtinë dhe investimet ndërkombëtare të Mbretërisë së Bashkuar.
Ish-nëpunës civilë që kanë folur për BBC News kanë pohuar se disa shpenzime të tij ishin jashtë kontrollit. Një ish-nëpunës që punonte në departamentin përkatës të tregtisë në fillim të viteve 2000 tha se kishte refuzuar një kërkesë për “shërbime masazhi” pas vizitës së Andrew në Lindjen e Mesme, e cila më vonë u miratua nga zyrtarë të lartë.
Ai deklaroi: “Mendova se ishte gabim… Thashë se nuk duhej paguar, por u pagua.”.
Pozicioni i Andrew si përfaqësues special ishte i papaguar, por misionet jashtë vendit mbuloheshin nga fondet qeveritare dhe mbështeteshin nga nëpunësit civilë.
Një tjetër ish-zyrtar i Whitehall-it, përgjegjës për financat, konfirmoi se kishte parë akuza të ngjashme dhe ishte “absolutisht i sigurt” për saktësinë e tyre.
Ai theksoi fluturime të tepërta, një numër të madh dhomash hoteli dhe shpenzime për shoqëruesit e tij, të ndara në buxhete të ndryshme dhe të miratuara pothuajse automatikisht pa mbikëqyrje domethënëse.
Ndërkaq, në Shtetet e Bashkuara, një ish-punonjës i Jeffrey Epstein, Havan Alessi, dëshmoi se Andrew merrte “masazhe të përditshme” gjatë vizitave të tij.
Emailet e lidhura me Epstein përfshinin gjithashtu një listë pagesash për masazhe për një person të quajtur “Andrew”, edhe pse nuk është konfirmuar identiteti i saktë.
Anëtarët e Komitetit të Biznesit dhe Tregtisë të Mbretërisë së Bashkuar pritet të diskutojnë mundësinë e nisjes së një hetimi mbi rolin dhe llogaridhënien e të dërguarve të tregtisë, ndërsa këto akuza po shkaktojnë shqetësim për menaxhimin e fondeve publike dhe standardet etike të përfaqësuesve zyrtarë.