Fermerët në zonën e Lushnjës po vazhdojnë të përballen me vështirësi të shumta këtë sezon bujqësor. Ditët e para të prillit falë dhe kushteve atmosferike tokësore kërkojnë mbjelljen e kulturave si misri dhe luledielli.
Por sipas fermerëve, kostot e larta po e bëjnë gjithnjë e më të vështirë vijimin e aktivitetit. Rritja e çmimit të naftës, shtrenjtimi i plehrave kimike dhe kostot e punimeve bujqësore, të kombinuara me mungesën e subvencioneve reale nga shteti, rrezikojnë seriozisht falimentimin e tyre.
Mungesa reale e suvencioneve në bujqësi dhe burokracia për plotësimin e kushteve që në realitet nuk plotësohen dot nga fermerët do të çojnë në braktisjen e punimit dhe kultivimit të tokave, ku sot mbi 60 % të tokave janë djerrë e të papunuara.
Ndërkohë, edhe për ata që kanë investuar, prodhimi pritet të jetë të paktën 40% më i kushtueshëm. Kjo i vendos fermerët vendas në një pozicion të pafavorshëm në treg, përballë produkteve të importit të cilat shpesh shiten më lirë.