Presidenti kinez Xi Jinping dhe Kryeministri britanik Keir Starmer u takuan në Pekin, duke sinjalizuar ringjalljen e marrëdhënieve pas vitesh tensioni. Palët ranë dakord të zgjerojnë bashkëpunimin ekonomik, shkencor dhe arsimor.
Londra po kthen sytë nga Pekini. Takimi mes Presidentit kinez Xi Jinping dhe Kryeministrit britanik Keir Starmer shënon vizitën e parë të një kryeministri britanik në Kinë pas tetë vitesh dhe sinjalizon një përpjekje për të rihapur dialogun mes dy vendeve, pas një periudhe të gjatë tensioni dhe mosbesimi.
Gjatë takimit dypalësh, Xi Jinping deklaroi se Kina është e gatshme të ndërtojë një partneritet strategjik afatgjatë me Mbretërinë e Bashkuar. Palët ranë dakord të zgjerojnë bashkëpunimin në fusha kyçe si arsimi, shëndetësia, financat, inteligjenca artificiale, shkencat biologjike dhe energjitë e reja.
Pekini njoftoi gjithashtu se po shqyrton heqjen e vizave për shtetasit britanikë, ndërsa i kërkoi Londrës të krijojë një mjedis të drejtë dhe jo diskriminues për kompanitë kineze që operojnë në Mbretërinë e Bashkuar.
Nga ana e tij, Keir Starmer tha se Britania synon një marrëdhënie “më të sofistikuar” me Kinën, duke theksuar rëndësinë e investimeve dhe tregtisë në një kohë kur ekonomia britanike përballet me rritje të dobët.
Vizita vjen në një moment të ndjeshëm gjeopolitik, me tensione të shtuara tregtare mes Kinës dhe Shteteve të Bashkuara, si dhe pasiguri në aleancat tradicionale perëndimore. Kina, nga ana tjetër, po kërkon të forcojë lidhjet me ekonomitë evropiane për të kompensuar presionet e jashtme.
Megjithatë, pavarësisht buzëqeshjeve dhe simbolikës diplomatike, dallimet mbeten të thella. Çështjet e Hong Kongut, Tajvanit, të drejtave të njeriut dhe sigurisë kombëtare vazhdojnë të ndajnë dy vendet.
Gjithsesi takimi shihet jo si një rifillim i plotë i marrëdhënieve, por si hapi i parë drejt një shkrirjeje të ngadaltë diplomatike mes Londrës dhe Pekinit.