Vendoset masa e sigurisë “arrest në burg” për 26 vjeçaren Emanlinda Rama, Valbona Rama, 53 vjeçe (nëna e saj) dhe Çlirim Dogani, në lidhje me vrasjen e 56-vjeçarit Anesti Rama në Frashër të Patosit.
Mesditën e sotme tre të dyshuarit u paraqitën në Gjykatën e Shkallës së Parë të Juridiksionit të Përgjithshëm Fier.
Gjyqtari i çështjes u caktua Klodiana Kryeziu, ndërsa prokurore ishte Lorena Salillari.
Raportohet se të tre të akuzuarit kanë mohuar krimin para gjykatës.
Ngjarja e rëndë shokoi mbarë opinionin publik, edhe për vetë dritëhijet me të cilat u shoqërua kjo ngjarje tronditëse për shkak të dëshmive kontradiktore .
Kryefamiljari 56-vjeç, Anesti Rama u vra nga vajza e tij, Emanlinda Rama në bashkëpunim me nenën e saj dhe Çlirim Doganin, me të cilën mendohet se e reja kishte lidhje dashurore.
26 vjeçarja vrau babanë duke e mbytur me tel dhe së bashku me nënën e saj inskenuan vdekjen e tij. Përveç mbytjes me tel, kryefamiljarit iu gjetën edhe plagë në trup dhe në organet gjenitale duke e bërë këtë një nga rastet më tronditëse të viteve të fundit në Fier.
Hetimet vijojnë dhe pritet që analizat e ADN-së të ndihmojnë në zbardhjen e plotë të ngjarjes, veçanërisht për të përcaktuar rolin e saktë të Çlirim Doganit në këtë krim të rëndë.
Dyshohet se vajza fillimisht e ka goditur babanë e saj në organet gjenitale, dhe pasi ai ka rënë në tokë, Dogani e ka mbajtur nga duart teksa ajo e mbyste me tel.
Po ashtu dyshohet se ata kanë përdorur edhe mjete të forta dhe mjete prerëse.
Ndërkohë nëna e 26-vjeçares ka ndihmuar në fshehjen e gjurmëve dhe pastrimin e gjakut nga trupi i viktimës.
Krimi është zbuluar nga përgjimi i telefonit, ku 26-vjeçarja pas ngjarjes ka komunikuar me bashkëpunëtorin e saj, Dogani, që dyshohet se kishte lidhje intime me të. Ky i fundit ishte i martuar dhe baba i dy fëmijëve.
