Kandidatët e Partisë Demokratike në Tiranë dyshojnë në manipulimet që kanë bërë numëruesit e tyre gjatë procesit të numërim të votave në Tiranë.
Tre prej kandidatëve të listës së hapur i janë drejtuar KAS-it me kërkesë zyrtare për të bërë rinumërimin.
Ilir Alimehmeti shprehet se përqindja e votave të kaluar në favor të kandidatëve të tjerë është 5%, ndërkohë që diferenca mes votave të tij dhe Jorida Tabakut është 1.2%.
Dyshime për manipulim të procesit kanë edhe Mimoza Hajdarmataj dhe Lisandër Hoxha.
Kërkesat e kandidatëve të PD:
Ilir Alimehmeti: Duke u bazuar në këqyrjet e deritanishme rezulton se me një parregullsi në masën rreth 5% të votave të miratuara të konstatuara nga ana ime, duke pasur parasysh faktin që subjekti ynë PD-ASHM ka 164.316 vota, rezultati për kandidatët mund të ndryshojë, në kushtet që diferenca midis meje dhe kandidatit të renditur përpara në listë është tejet i ngushtë, ose rreth 1.2% e numrit total të të gjitha votave të subjektit.
Mimoza Hajdarmataj: Kam marrë 5233 vota si kandidat në listën e hapur. Gjatë procesit të verifikimit nga ana ime, kam vërejtur disa parregullsi, të cilat mund të ndikojnë në ndryshimin e rezultatit në mënyrë tejet të ndjeshme, përsa i përket renditjes sime në tabelën e kandidatëve. Duke u bazuar në këqyrjet e deritanishme rezulton një parregullsi në masën mbi 1000 vota në të paktën 6 KZAZ.
Lisandër Hoxha: Kërkoj rinumërimin dhe rivlerësimin e votave preferenciale të kandidatëve. Kjo nisur nga konstatimi në videot e marra, jo të plota, nga ana e KQZ, të procesit të numërimit të votave të zgjedhësve. Konkretisht në KZAZ 28, kutia 1565, konstatoj se disa vota preferenciale të miat, janë regjistruar në emër të një kandidati tjetër. Sipas informacioneve, ky fenomen ka ndodhur edhe në KZAZ të tjera, duke tjetërsuar rezultatin e zgjedhjeve.
