Procesi i integrimit të Shqipërisë në Bashkimin Europian po përballet me sfida të reja pas paralajmërimit të Greqisë se do të bllokojë hapjen e kapitujve të rinj të negociatave.
Ky vendim i Athinës lidhet drejtpërdrejt me çështjen e Fredi Belerit, kryetarit të zgjedhur të Bashkisë Himarë, i cili aktualisht ndodhet në paraburgim me akuza për blerje votash.
Autoritetet greke kërkojnë që Beleri të lejohet të ushtrojë mandatin e tij dhe shprehin shqetësim lidhur me të drejtat e minoritetit grek në Shqipëri, duke e cilësuar ndalimin e tij si një shkelje të këtyre të drejtave.
Në këtë kuadër, Greqia ka paralajmëruar se nuk do të japë mbështetje për avancimin e mëtejshëm të negociatave për anëtarësim në BE, për aq kohë sa kjo çështje nuk zgjidhet.
Nga ana tjetër, qeveria shqiptare thekson se sistemi i drejtësisë funksionon në mënyrë të pavarur dhe se çështja e Belerit është një ceshtje juridike, e jo politike.
Megjithatë, pa marrëveshje me Athinën, procesi i integrimit mund të ngadalësohet ndjeshëm, duke rrezikuar afatet dhe objektivat e vendit për anëtarësim.
Në Bruksel, kjo situatë po ndiqet me vëmendje, pasi çdo mosmarrëveshje mes vendeve anëtare mund të ndikojë në dinamiken e zgjerimit të Bashkimit Europian, veçanërisht për vendet e Ballkanit Perëndimor.
Ndërkohë, priten ndërhyrje diplomatike për të zbutur tensionet dhe për të gjetur një zgjidhje të pranueshme për të dyja palët.
