Manastiri i Ardenicës më 8 shtator, festoi ditën e Lindjes së Shën Marisë, një traditë e rikthyer për besimtarë ortodoksë të zonës dhe jo vetëm, por edhe për banorët dhe turistët e shumtë që vizitojnë Manastirin e Ardenicës.
Liturgjia e Shenjtë në kishë u drejtua nga Mitropoliti i Apollonisë dhe Fierit, Imzot Nikolla që shpërndau mesazhin e dashurisë dhe nderimit të lindjes së Shën Marisë.
Festa tradicionale me panairin, ku promovohen kulinaria, prodhimet bujqësore dhe artizanale të zonës nuk u zhvillua.
Këtë vit Bashkia Lushnjë, Qendra Kulturore e Fëmijëve, këngëtarë të muzikës popullore dhe me pjesëmarrjen e nxënësve të shkollës së Kolonjës organizuan një festë simbolike me këngë e valle tradicionale. Turistët nga vende të ndryshme që vizituan Manastirin gjithashtu u përfshinë në këtë atmosferë festive.
Të pranishëm ishin Kryetarja e Bashkisë Eriselda Sefa, Prefekti i Qarkut Fier, Arben Çuko, si dhe deputetët e zgjedhur të PS.
Prefekti Çuko dhe Kryetarja Sefa uruan besimtarët ortodoksë dhe theksuan vlerat kulturore dhe historike të Manastirit të Ardenicës.
Manastiri i Ardenicës, i ndërtuar në vitin 1282, mbetet një prej monumenteve më të rëndësishme të trashëgimisë sonë që është kthyer në një prej destinacioneve turistike më të rëndësishme në vend.