Kreu i Partisë Demokratike, Sali Berisha, ka lëshuar akuza të rënda ndaj qeverisë dhe eksponentëve të krimit, duke deklaruar se individë të përfshirë në aktivitete kriminale janë shpërblyer me leje ndërtimi pas mbështetjes në zgjedhjet vendore të 11 majit.
Në një konferencë për shtyp, Berisha përmendi emra të njohur të botës së krimit si Altin Hajri dhe Suel Çela, duke i akuzuar se kanë marrë leje për ndërtime shumëkatëshe si shpërblim për ndihmën në fushatë.
“Altin Hajri, i njohur për përfshirjen në vrasjen makabre të Jan Prengës, është ‘në kërkim’ por i lirë dhe i shpërblyer me leje për ndërtimin e një pallati 21-katësh në Durrës. Leja është miratuar në emër të bashkëshortes së tij, Valentina Hajri, përmes kompanisë ‘Pjeza 2022’”, tha Berisha.
Ai akuzoi gjithashtu Saimir Tushën, të dënuar më parë për trafik droge, si përfitues të lejeve për disa pallate deri në pesë kate mbi tokë. Tusha sipas Berishës, ka qenë aktiv në fushatën e kandidatit të PS në Durrës dhe zotëron të gjithë kapitalin e kompanisë “Saeli Konstruksion”.
Berisha vijoi me pretendimet për pastrim parash përmes kompanive ndërtimi, duke përmendur një leje për një objekt 37-katësh në Tiranë, ku sipas tij qëndron pas Arian Ormenaj, i lidhur me grupin kriminal Çopja dhe eksponentë të tjerë në Elbasan dhe Dubai. Ai akuzoi se ndërtimi në Shqipëri është kthyer në lavatriçen kryesore të parave të pista të grupeve kriminale.
“Nuk është rastësi që në krye të Agjencisë së Urbanistikës është vendosur një person i lidhur me njerëz pranë Suel Çelës. Treguesit e ndërtimit në Shqipëri janë trefish më të lartë se në BE – kjo është arsyeja pse”, përfundoi Berisha.
Berisha: Altin Hajri dhe Suel Çela kanë marrë leje ndërtimi Jo vetëm ai. Altin Hajri, famoz, vrasës brutal, një njeri, pronar lokali në të cilin u nda në copa trupi i Jan Prengës, gjoja në kërkim, merr pjesë aktive në fushatën elektorale dhe kërcënon demokratët.
Ky vrasës i shpërfytyruar thuhet se ka paguar për të shmangur akuzën për vrasjen në fillim gjer në 700 mijë euro dhe është lakuar emri i Altin Dumanit.
Por ky është i lirë që nga ajo ditë, gjoja në kërkim.
Altin Hajri është shpërblyer nga Edi Rama me datën 26 mars me leje ndërtimi pallat 21 kate, 18 mbi tokë, 3 nën tokë.
Bashkia e Durrësit, subjekti zhvillues shoqëria Pjeza 2022, Valentina Hajri, bashkëshortja e Altin Hajrit, një nga kapobandat e Shijakut. Hajri është në kërkim nga SPAK për pjesëmarrje në disa ngjarje kriminale, që nga trafiku i drogës, pengmarrje, vrasje, ndërhyrje në zgjedhje.
Altin Hajri është autori i vendosjes në lisë të sigurt të Jurgen Çyrbjes në vitin 2021.
Dhe e bukura është se Çyrbja, që e mbronte, i kërkonte ku po e kërkon policia, është në burg, kurse Altini është i lirë dhe merr leje për të ndërtuar pallat 21 katësh, për të larë paratë e drogës sigurisht.
Tani na del aksioner, ç’është e vërteta, ka qenë pronar kryesor. Dhe asgjë e tij nuk është konfiskuar. Golden në asnjë mënyrë, pavarësisht se aty doli njeriu i prerë copa, por Golden vazhdon aktivitetin sepse Altin Hajri është i paprekshëm.
Tjetër. Saimir Tusha, ky është blerës votash për famozin Drazhi. Leje ndërtimi për objekt me funksion banimi, disa pallate, gjer 5 kate mbi tokë dhe 2 kate nën tokë. Gjithnjë Durrësi domeni i tyre. Saimir Tusha është i dënuar për trafik droge. I është sekuestruar pasuria prej 2 milionë euro në vitin 2018. Në vitin 2011 është denoncuar nga PD, zonja Albana Vokshi, si blerës votash për mazhorancën. Në fushatën e 11 majit dyshohet se ka punuar për kandidatin e PS, Drazhi. Tusha rezulton pronar me 100 përqind të kapitalit dhe në shoqërinë Saeli Konstruksion.
Prandaj ta kenë të qartë qytetarët sepse Adelajda e dy lejtantëve të Suel Çelës është drejtoresha e përgjithshme e agjencisë së urbanistikës në Shqipëri sepse të gjitha klanet e drogës kanë vetëm një lavatriçe të pakufishme dhe ky është ndërtimi në Shqipëri. Kjo është arsyeja se pse Shqipëria e ka treguesin e ndërtimit tre herë më të lartë se BE.
Kompania guaskë e Arjen Ormenajt ka marrë leje zhvillimi për objekt mix prej 37 kate në bulevardin e ri në Tiranë me subjekt zhvillues Ylla Sula. Sipas informacioneve, pas këtij emri dyshohet se qëndron Arian Ormenaj, njeriu i akuzuar se pastron paratë e grupit Çopja të Elbasanit dhe Darit të Dubait. Yllka Sulaj pasi merr dhuratë nga një prej ortakëve italianë në Shqipëri, 14 përqind të aksioneve ia dhuron Arjen Ormenajt. Megjithëse selia e shoqërisë ishte në Tiranë, palët kanë preferuar të lidhin kontratën në Elbasan. Se aty ishte gjykatëse Fetahu, aty ishte prokurore Enkelejda Fetahu, aty ishin famëzinjtë prokurorë dhe gjykatës që ishin si motër dhe vëllezër binjakë me vrasësit dhe bandën e kartelit të Suel Çelës.
Pas kësaj, Yllka Sula bëhet ortake në kompaninë 55CA me ortak Julian Çuku. Yllka Sula rezulton aksionere ose ortake e vetme në 7 kompani ndërtimi, të gjitha me kapitale të papërfillshme. Dëgjojeni ju, superkontruktoren. Keni ju një imagjinatë të tillë? Ylli i ndërtimit në Europë shpallet Yllka me 7 kompani ndërtimi. Të gjitha me kapitale mafioze.
Vazhdojmë.
Leje ndërtimi për objekt rezidencial në Dhërmi, zhvillues Janaq Gerco dhe Namik Idrizi. Gerco është ortak me Arian Ormenaj në kompaninë B%J Invest. Aksionet Ormenaj i ka blerë në vitin 2019 nga një investitor durrsak me emrin Bekim Halilaj për 50 mijë lekë. Janaq Gerco është ortak dhe në 4 kompani të tjera ndërtimi, dy prej të cilave rezultojnë të pezulluara. Namik Idrizi nuk rezulton të jetë sipërmarrës i drejtpërdrejtë. Nga hulumtimet, Idrizi rezulton i punësuar si agjent doganor. Në vitin 2016 është arrestuar për kontrabandë të lëndëve drusore drejt Greqisë, bashkë me biznesmenin Agim Pisha. Ky i fundit një vit më pas do arrestohet për tentativë të nxjerrjes së 30 kg heroinë nga porti i Durrësit.
Natyrisht heroinën e ka karteli Çela, i patronuar fuqishëm nga Taulant Balla deri tani së fundmi.
