TIRANË- Njësia e Antiterrorit në vend ka rritur numrin e agjentëve dhe efektivëve në institucionet diplomatike dhe shtetërore në vend. Kjo lëvizje vjen një ditë pas alarmit të Ambasadës amerikane se grupe të lidhura me Iranin mund të shënjestrojnë vendin tonë.
Mësohet se njësitë e Antiterrorit kanë zhvilluar takime me përfaqësues të Ambasadës Amerikane dhe asaj Izraelite, në kuadër të koordinimit të veprimeve dhe rritjes së gatishmërisë për çdo skenar të mundshëm. Në fokus të këtyre masave janë kryesisht ambasadat, godina e muxhahedinëve në Manëz, si dhe sheshe e hapësira të mëdha publike në vend, të konsideruara si pika me ndjeshmëri të lartë.
Në kuadër të këtij plani, pritet një shtim i prezencës së forcave policore në terren, ndërsa pjesë e grupit të punës është edhe SHISH, i cili në bashkëpunim me Antiterrorin do të ketë një vëmendje të shtuar ndaj sigurisë së objekteve diplomatike.