Detaje të një plani të dyshuar sekret për përmbysjen e regjimit iranian, i hartuar nga shërbimi izraelit i inteligjencës Mossad, janë publikuar nga televizioni izraelit Channel 13.
Sipas raportimit, operacioni i koduar “Maçoku me çizme” parashikonte përdorimin e forcave kurde dhe ish-presidentit iranian Mahmoud Ahmadinejad si pjesë e një skenari për ndryshimin e pushtetit në Teheran.
Sipas këtij raporti, plani fillimisht kishte marrë mbështetje nga Uashingtoni dhe parashikonte që sulmet izraelite të godisnin pozicionet e Gardës Revolucionare Islamike përgjatë kufirit Iran-Irak, në rajonin e Kurdistanit iranian.
Qëllimi i operacionit, sipas Channel 13, ishte krijimi i një korridori për luftëtarët kurdë që do të hynin në territorin iranian dhe do të përparonin drejt qyteteve kurde në veriperëndim të vendit.
Mossadi, sipas raportimeve, kishte vlerësuar se mijëra të rinj kurdë mund t’u bashkoheshin këtyre forcave, duke krijuar një lëvizje të gjerë që do të mund të shtrihej deri në kryeqytetin iranian. Faza përfundimtare e planit parashikonte protesta masive në rrugë, të cilat do të çonin në dobësimin dhe rrëzimin e regjimit.
Ahmadinejad si “kalë troje”
Një element kyç i planit, sipas raportimit, ishte roli i ish-presidentit iranian Mahmoud Ahmadinejad. Sipas Channel 13, ai ishte parashikuar si një figurë që mund të rikthehej në pushtet pas ndryshimit të regjimit.
Gazeta amerikane New York Times kishte raportuar më herët për përpjekje shumëvjeçare nga Izraeli për të krijuar kontakte me Ahmadinejadin dhe për ta afruar atë sërish në skenën politike iraniane. Sipas këtij raportimi, një takim mes tij dhe ish-kreut të Mossadit, David Barnea, dyshohet se është zhvilluar në vitin 2024 në Hungari, në kuadër të një konference akademike.
Megjithatë, sipas Channel 13, plani nuk u zbatua. Rrjedhjet në media, presioni nga Turqia dhe hezitimi i disa grupeve kurde thuhet se çuan në tërheqjen e mbështetjes amerikane për këtë operacion.
Raporti pretendon gjithashtu se Izraeli dhe Shtetet e Bashkuara më pas ndërmorën sulme ndaj objektivave të sigurisë iraniane në veriperëndim të vendit, përfshirë baza ushtarake, sisteme raketore dhe struktura të forcave të sigurisë, por pa kaluar në fazën e ndërhyrjes tokësore.
Plani “Maçoku me çizme” mbetet një nga pretendimet më të bujshme mbi përpjekjet e mundshme për ndryshimin e regjimit në Iran, ndërsa autoritetet izraelite dhe amerikane nuk kanë konfirmuar zyrtarisht ekzistencën e tij.