NASA ka vendosur të rikthejë në Tokë katër astronautë nga Stacioni Ndërkombëtar Hapësinor më shumë se një muaj përpara afatit. Vendimi për një kthim të rrallë dhe të parakohshëm nga hapësira vjen pas një incidenti mjekësor të pazbuluar që ka ndodhur në bordin e Stacionit Ndërkombëtar Hapësinor.
Katër astronautë të misionit Crew-11 të NASA-s, mes tyre dy amerikanë, një japonez dhe një kozmonaut rus, pritet të largohen nga stacioni brenda ditëve të ardhshme, më shumë se një muaj përpara përfundimit të planifikuar të misionit.
NASA konfirmon se anëtari i ekuipazhit që ka shfaqur problemin shëndetësor ndodhet në gjendje të qëndrueshme dhe nuk ka nevojë për trajtim urgjent gjatë kthimit.
Megjithatë, sipas shefit të mjekësisë në NASA, doktor James Polk, ekzaminimi i plotë i gjendjes së astronautit mund të kryhet më mirë në Tokë, ku mundësitë diagnostikuese janë shumë më të avancuara se në orbitë.
Vendimi për të përshpejtuar kthimin u mor nga administratori i ri i NASA-s, Jared Isaacman, i cili theksoi se në javët në vijim pritet të niset një ekip i ri drejt stacionit hapësinor, çka e bën të mundur ruajtjen e sigurisë dhe funksionimit normal të laboratorit orbital.
Përkohësisht, në stacion do të mbetet vetëm një astronaut i NASA-s, i cili, sipas zyrtarëve, është i trajnuar për të përballuar çdo situatë deri në mbërritjen e ekuipazhit të ri.
Ekspertët e mjekësisë hapësinore theksojnë se trajtimi i astronautëve në mikrogravitet paraqet sfida të veçanta, pasi edhe probleme të zakonshme shëndetësore mund të shndërrohen në emergjenca komplekse në kushtet e hapësirës.
NASA, ndërkohë, ruan traditën e saj për të mos zbuluar identitetin dhe detajet mjekësore të astronautëve, duke i bërë publike këto të dhëna vetëm në kuadër të studimeve shkencore afatgjata.
Kthimi i parakohshëm i Crew-11 përfaqëson një nga rastet e rralla kur misionet e orbitës ndryshojnë planin për arsye mjekësore, duke treguar edhe një herë se siguria e ekuipazhit mbetet prioritet absolut për agjencinë hapësinore amerikane.