Një 21-vjeçare e identifikuar si Micol Dal Molini me nënshtetësi italiane është arrestuar nga Policia e Sarandës, pasi në bashkëpunim me dy shtetase të tjera ka vjedhur sende me vlerë si bizhuteri dhe parfume në zonën e Ksamilit me vlerë 150 000 lekë.
Blutë kanë sekuestruar një pjesë të sendeve të vjedhura në cilësinë e provës materiale.
Gjithashtu janë proceduar në gjendje të lirë edhe dy bashkëpunëtoret e 21-vjeçares Gaia Dal Molini dhe Gaia Canon.
Njoftim i Policisë:
Strukturat hetimore të Komisariatit të Policisë Sarandë, në vijim të veprimeve për goditjen e krimeve kundër pronës, pas marrjes së njoftimit për një vjedhje të ndodhur në zonën e Ksamilit, zhvilluan një punë hetimore të shpejtë dhe profesionale, e cila bëri të mundur identifikimin e autorëve, si dhe dokumentimin e plotë të gjithë mekanizmit të ngjarjes.
Konkretisht, si rezultat, u arrestua në flagrancë shtetasja italiane:
• M. D., 21 vjeçe.
Gjithashtu, u proceduan penalisht në gjendje të lirë 2 bashkëpunëtoret e saj, shtetase italiane:
• G. D., 18 vjeçe,
• G. C., 22 vjeçe.
Nga hetimet dyshohet se këto shtetase, më datë 21.08.2025, në bashkëpunim me njëra-tjetrën, kanë kryer vjedhje të sendeve të ndryshme (bizhuteri, parfume dhe suvenire), të vendosura në stenda, në zonën e bulevardit të Ksamilit, me vlerë rreth 150 000 lekë.
Në cilësinë e provës materiale u sekuestruan një pjesë e sendeve të vjedhura.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Vjedhja”, kryer në bashkëpunim.